Vergelt’s Gott Heimat
1.
Vergelt`s Gott für eure offna Ohrn
Wenn i bei eich bi wird ma worm
a wenn`s ganz koid is überroi
mit eich zum Lacha duad ma woi
Heimat is wo de Tür aufgeht
wenn ma ganz urplötzlich davorsteht
wo ohne Frogn a Platz is frei
und ma se ka no fürn andan gfrei
2.
Vergelt`s Gott für a jeds guads Wort
Wenn da Himme is a schena Ort
dann spür i davo bei eich no
des Paradies auf Erdn scho.
Heimat is wo a Liachtl brennt
wo`s gesellig is und ma se kennt
wo ma ohne Umständ vui dalebt
und a moi Schmarrn und Bledsinn redt
3.
Vergelt`s Gott für so manches Schweigen
wenn ma nix sogn ka im schlimma Leidn
Wenn mas aushoit und se trotzdem trogt
und ned nachm eigna Vorteil frogt
Heimat is wo i i selber bi
koa Absziehbuidl und koa Kopie
wo i nix vorspui, mi ned verbiag
und jeda merkad, wenn i liag
